Kredit tarixi nima va u nega muhim

Kredit tarixi — siz olgan kreditlar va ularni qanday qaytarganingiz haqidagi ma'lumot. Uni kredit byurosi yuritadi, banklar va mikromoliya tashkilotlari esa yangi arizani ko'rib chiqishda unga qaraydi.

To'lovlarni o'z vaqtida qilsangiz, tarixingiz yaxshilanadi va keyingi kreditlarni olish osonlashadi. Kechikishlar ham qayd etiladi: ular faqat bizda emas, boshqa bank va tashkilotlarda ham kredit olishni qiyinlashtiradi.

To'lov kechiksa, qarz penya bilan ortadi. Penya miqdori va boshqa shartlar "Mijozlar uchun" sahifasida ochiq ko'rsatilgan. Uzoq kechikishda qarz majburiy undirilishi, mol-mulk va hisobvaraqlar xatlanishi mumkin.

To'lashda qiyinchilik paydo bo'lsa, kechiktirmasdan bizga qo'ng'iroq qiling yoki ofisga keling. Muammoni vaqtida aytish uni hal qilishni osonlashtiradi.

O'z kredit tarixingizni kredit byurosi (KATM) orqali tekshirib turishingiz mumkin. Bu nomingizga siz bilmagan kredit olinmaganini ham ko'rsatadi.